ಲಹರಿ --- ೩


        {(ಲಹರಿ ೧  ಹಾಗು ಲಹರಿ ೨  ಕ್ಕೆ ಇಲ್ಲಿ ಕ್ಲಿಕ್ಕಿಸಿ )}

ನಿಲ್ಲು ವಿವರಿಸಬೇಡ ಹೇಳು
ಅಲ್ಲಿ ಕಂಡದ್ದರ ಕುರುಹಿನ ಪತ್ತೆ
ಎಲ್ಲರೂ ಹೇಳುವವರೆ  ನಾನೂ ಮತ್ತೆ
ಆಭಾರಿ
ಶಿಕಾರಿ ತಕ್ಕುದ್ದಲ್ಲ
ಬಿಟ್ಟು ಬಿಡು ಸುಮ್ಮನೆ
ಎಲ್ಲಿ ನೋಡಿದರಲ್ಲಿ ಚೆಲ್ಲಿದೆ 

ವೈರುಧ್ಯದ ನಿರೂಪಣೆಯ ಪ್ರಾತಿನಿಧ್ಯಕ್ಕೆ
ನಿನ್ನ ಬಳಿ ಬಂದೆನೆಂದೇ ನಾ ಭಾವಿಸಿದ್ದೆ
ನೀನೋ ನಕ್ಷೆಗೆ ಸಿಲುಕದ ಸಾಧ್ಯತೆ 
ನಿರಂತರತೆಯ ರೂಪಾಂತರಕ್ಕೆ
ಪ್ರತಿಸ್ಪರ್ಧಿಯಾಗಿ ನನ್ನನ್ನು ಆಯ್ದೆಯ ?
ಆ ಘಟನೆಯ ?
ಕಡು ನೀಲಿ ಹಕ್ಕಿ
ನೀರಲ್ಲಿ ಹೂವರಳಿ
ಪುಟಿದಿತ್ತು ಮೀನು
ಹೊಡೆತಕ್ಕೆ ಊರೂರೆ ಕಾಣೆ
ಇಡೀ ಊರೂರೆ ಕಾಣೆ

ಲಹರಿಯ ಹದಕ್ಕೆ ಯಾವುದೂ ಬೇಡದ್ದಲ್ಲ
ಅದು ಹಾಗೇ ಅದರ ಧಿಮಾಕೇ ಹಾಗೆ
ಘಟನೆ ಮೂಲಭೂತವಾದದ್ದು
ಅಮೇಲಿನದ್ದೆಲ್ಲಾ ಕಟ್ಟಿದ್ದು
ಹಗ್ಗ ಕಂಬಿ ಕೋಲು ಕುಡಗೋಲು
ಗುಡುಗು ಮಿಂಚು ಮಳೆ
ನೀರು ಹರಿಯುತ್ತಿದೆ
ಬಣ್ಣ ಬೆರೆತು ಬೂದಿ ಬೆರೆತು
ಹರಿಯುತ್ತಿದೆ

ಹೂವ ದಳಗಳಡಿಯಿಂದ
ಕತ್ತೆತ್ತಿ ವಟಗುಟ್ಟುತ್ತೆ ಕಪ್ಪೆಗಳು
ವಟ ವಟ ವಟ
ಮಳೆಗಾಲ ಮುಗಿದಿಲ್ಲ
ಪರ್ವತಗಳು ಅಲುಗಾಡುತ್ತೆ ಸಮುದ್ರ ಉಕ್ಕಿದೆ
ನೀರು ಎಲ್ಲೆಲ್ಲೂ ನೀರು

ಎಂತಹ ಸಿದ್ಧ ಅನುವಾದಕನಿಗೂ
ಸಿಗಲಿಕ್ಕಿಲ್ಲ ಮೆಜೆಸ್ಟಿಕ್ಕಿನ ಬೆಳಗು
ಜನ ಜನರ ಭಾಷೆ ಸಿಕ್ಕುತ್ತಿಲ್ಲ
ಬರೀ ಶಬ್ಧ ಎಲ್ಲೆಲ್ಲೂ ಶಬ್ಧ 
ನಿಶ್ಯಬ್ಧದ ಗುಂಗನ್ನು ಹಾರಿಸಿ ಏರಿಸಿ
ಮಲಗಿಸಿಬಿಡುತ್ತೆ
ಏನಯ್ಯ ಬೇಕು ಸಮ್ಮೋಹನಕ್ಕೆ
ಮೆಜೆಸ್ಟಿಕ್ಕಿನ ಬೀದಿಗಳಿಗಿಂತ ಹೆಚ್ಚಾಗಿ
ಧ್ಯಾನಿಸಲಿಕ್ಕಿನ್ನೇನು ಬೇಕು
ಹುಟ್ಟಿದಂದಿನಿಂದ ರೂಮ್ ಬಾಯ್
ಮುಪ್ಪರಿಯದ ಮುದುಕನಿಗಿಂತ ಹೆಚ್ಚಾಗಿ

ಧನುಷ್ಕೋಡಿಗೆ ಹೋಗಬೇಡವೆಂದೇಕೆ ಹೇಳಿದೆ
ಪಾಳು ಬಿದ್ದ ಊರು - ಸತ್ಯಕ್ಕೆ
ಎರಡೂ ಬದಿ ಸಮುದ್ರ ಬಿಳೀ ಮರಳ ರಾಶಿ
ಕೂಗಳತೆಗೆ ಮಗದೊಂದು ದೇಶ
ಮನೆ ಮಠ ಚರ್ಚು ಗೋರಿ
ಎಲ್ಲವೂ ಪಾಳುಬಿದ್ದರೂ
ಈಗದೊಂದು ಪ್ರೇಕ್ಷಣೀಯ ಸ್ಥಳ
ಚರಿತ್ರೆಗೆ ಗುರುತಿಸಲಿಕ್ಕೊಂದು ನೆನೆಪು

ಲಹರಿಗೆ ಹಾಗಲ್ಲ
ಲಹರಿಯು ಹಾಗಲ್ಲ

ಶಿವನ ಎದೆ ಮೆಟ್ಟಿ ಕುಣಿವ ಕಾಳಿ
ಕಾಪಿಡು ------

....



೦೧. ಪ್ರದರ್ಶನ

ಕಟ್ಟಿಗೆಯ
ಬಾಬ್ ಕಟ್, ಕ್ಲಿಪ್ಪು ಸ್ಕರ್ಟ್
ಎದೆ ಮಟ್ಟದ ಶಿಲ್ಪ
ಮರದ ಬಾಚಣಿಕೆ
ಮುಖಕ್ಕೆ ಮೆತ್ತಿದ ಕನ್ನಡಿ

೦೨. ಅಧುನಿಕೋತ್ತರವಾದ

ಗುಂಪು ಗುಂಪು ಗೆದ್ದಲು ಹುಳುಗಳು
ರೆಕ್ಕೆ ಬಂದು ಹಾರಿ ಹೋಗುವಾಗ
ಹುಳ ಹೋಗಲೆಂದು ಹಾಕಿದ
ಹರಿಸಿನ ರೆಕ್ಕೆಗಳಿಗೆ ಬಳಿದು
ಚಿಟ್ಟೆಗಳಂತೆ ಕಾಣುತ್ತಿದ್ದವು

೦೩. ರಚನಾತ್ಮಕವಾದ

ಕಾಂಕ್ರಿಟ್ ಕಂಬಿಗಳು
ಆಗಾಗ ನೆರಳು
ಹಸಿರು ಮರಳು
ಒಂದಿಷ್ಟು ಕಸ

ಕಪ್ಪು ರೇಖೆಗಳು
ಬಿಳೀ ರೇಖೆಗಳು
ಕೆಂಪು ಮತ್ತೇ ಕಪ್ಪು
ನಿಶ್ಯಬ್ದದ ಪದರಗಳು
ಒಟ್ಟೂ ಚರ್ಮದ ಸುಕ್ಕಿನಂತೆ

೦೫. ವಾಸ್ತವ

ಗಲಬೆಯಲ್ಲಿ
ಮಕ್ಕಳ ಶೂಗಳು
ಚಲ್ಲಾಪಿಲ್ಲಿಯಾಗಿದ್ದಾಗ
ಕಸ ಆಯುವ ಹುಡುಗ
ತನ್ನ ಕಾಲಿಗೊಂದುವ
ಶೂ ಹುಡುಕುತ್ತಿದ್ದ

೦೬. ಕಲೆ

ಅವಳು ಬರೆದಿಟ್ಟಿದ್ದ
ಪ್ರಯೋಗಾಲಯದ
ಗ್ರಾಫ್ ಶೀಟಿನ ಮೇಲೆ
ಚಿತ್ರ ಬರೆದು ಪ್ರದರ್ಶಿಸಿ
ಬಹು ದೊಡ್ಡ ಕಲಾವಿದನಾದ

೦೭. ಅಭಿವ್ಯಕ್ತಿ

ಬಾಟಲಿನಲ್ಲಿ ಬಿದ್ದಿದ್ದ
ಮನುಷ್ಯನನ್ನು
ಮೇಲಕ್ಕೆತ್ತಲು
ಒಂದೊಂದೇ ಬಿಸ್ಕತ್ತನ್ನು
ಕಾಗೆ ತಂದು ಹಾಕುತ್ತಿತ್ತು