ಲಹರಿ ೨

ವಿವರಣೆಯೆಂದರೆ ಬಹು ಮೋಹ
ಬೇಟಿಯಾದಾಗ ಅವಳೇನೂ ಹೆಸರೇಳಿರಲಿಲ್ಲ
ಚುಂಬನ ಆಲಿಂಗನ ಅಪ್ಪುಗೆ ಹುಟ್ಟು


ಅಮಲಿನಲ್ಲಿದ್ದಾಗ ಆ ಕುಣಿತ
ಒಟ್ಟೂ ಅಂದಾಜಿನ ಫಲ ಈ ದಿಗ್ಬ್ರಮೆ
ರಸ್ತೆಗಳು ಬಿಕೋ ಅನ್ನುತ್ತಿವೆ
ಬಸ್ಸೂ ರೈಲೂ ಯಾವ ನಿಲ್ದಾಣದಲ್ಲೂ ಮನುಷ್ಯರಿಲ್ಲ
ಯಾವ ವಾಹನವೂ ಎಲ್ಲೂ ನಿಲ್ಲುತ್ತಿಲ್ಲ
ಬರೀ ನಿಲ್ದಾಣಗಳಷ್ಟೆ
ಪೇಪರ್ ಮಾರುವ, ಛಾ ಕಾಫಿ ಮಾರುವ
ಮಾತ್ರೆಗಳನ್ನು ಮಾರುವ ಅಂಗಡಿಗಳು
ಮೂತ್ರಾಲಯಕ್ಕೆ ಜನರ ನಿರೀಕ್ಷಿಸುತ್ತಾ ಕೂತವಗೆ
ಮನೆಗೆ ಮರಳಿ ಹೊರಡಬೇಕಿದೆ
ಯಾವ ವಾಹನವೂ ನಿಲ್ದಾಣದಲ್ಲಿ ನಿಲ್ಲುತ್ತಿಲ್ಲ.


ನಾರ್ಸಿಸಸ್ಸನ ಮೇಲದೆಂತಹ ಮೋಹ
ನೋಟಕ್ಕೆ ಆ ಪರಿಯ ಪ್ರಭಾವವಿತ್ತೆ?
ಪಕ್ಕದ ಮರದಿಂದೊಂದು ಎಲೆಯೊ ನೀರೊಳಗಿನ ಮೀನಿನ ನೆಗೆತವೊ
ಮೇಲಿನಿಂದೊಂದು ಹನಿ ಮಳೆಯೊ
ಅವನ ನೋಟವನ್ನು ಪಲ್ಲಟಿಸಬಹುದಿತ್ತಲ್ಲವೆ
ಕೊಳವೇ ಉಕ್ಕಿ ಹರಿದರೂ ನೆಟ್ಟ ನೋಟ ಚಲಿಸಲಾರದಷ್ಟು
ಸ್ಥಿರ ನೋಟವೆ ಅದು


ಅರೆ, ಪರೀಕ್ಷೆಯನ್ನಾದರೂ ಮಾಡೋಣವೆಂದರೆ
ಪ್ರಶಾಂತವಾದ ಕೊಳವಾಗಲಿ
ಆ ಪರಿಯ ದೀರ್ಘ ಮೋಹವನ್ನುದ್ದೀಪಿಸುವ ಪ್ರತಿಫಲನವಾಗಲೀ
ದೊರೆಯಲಿಲ್ಲವಲ್ಲ ನಾನೇನೂ ಸುಂದರನಲ್ಲವ ಇನ್ನದೆಷ್ಟು ಕೊಳಗಳನ್ನುಡುಕುವುದು


ಕರಗಿ ಹರಿದು ಹೋದದ್ದು ಎತ್ತಲಿಂದ
ಭೋ ಎನ್ನುತ್ತಾ ಸುರಿವ ಆಕಾಶಕ್ಕೆ
ಬೊಗಸೆ ಕೈ ಚಾಚಿ ಬೇಡುವುದರಲ್ಲೇನುಂಟು
ಲಹರಿ ತನ್ನದೇ ಹದಕ್ಕೆ ಬಾಗುವುದು ಬೇಯುವುದು
ಒಂದು ಅಭ್ಯಾಸ ಅಥವಾ ಹಟ
ಅಡ್ಡಪಡಿಸುವ ಧೀರತೆಯಾಗಲೀ ಮತ್ತೇನೂ ಆಗಲಾರದಿಲ್ಲಿ
ಹುದುಗಿದ ಹಸಿವಿಗೆ ಉಪವಾಸ ವ್ರತವೆ ಉತ್ತರ


( ನಾರ್ಸಿಸಸ್ಸ --- Narcissus "....he saw his own reflection in the water and fell in love with it, not realizing it was merely an image. Unable to leave the beauty of his reflection, Narcissus lost his will to live. He stared at his reflection until he died." Wiki )


ಒಂದು ಸಿನಿಮಾ ಕತೆ

                                               

ಎಲ್ಲವೂ ಸರಳೀಕರಣಗೊಂಡ
ವೇಷದಲ್ಲಿ ನಿಂತಿದ್ದ ಫಕೀರ
ಹಸಿರು ಬಳ್ಳಿಗಳು ಧಾರಾಳವಾಗಿ ಬೆಳೆದಿದ್ದ ಟಿಕೆಟ್ ಕೌಂಟರ್
ಪ್ರದರ್ಶನ ಸಮಯ ಮಾಸಿದ ಬಣ್ಣದಲ್ಲಿ
ಅಸ್ಪಷ್ಟವಾಗಿದ್ದ ಆ ಸಿನಿಮಾ ಮಂದಿರ
ಸುತ್ತ  ವತ್ತುವರಿಗೊಂಡಿದ್ದ ಕಾರು ಸ್ಕೂಟರ್
ಮೆಕ್ಯಾನಿಕ್ ಗ್ಯಾರೇಜ್ ಶೆಡ್ಡು

ಆಸ್ಪತ್ರೆಯಲ್ಲಿ ಮೂಗಿನಾಳದಲ್ಲಿ ಇಳಿದಿದ್ದ
ಸಣ್ಣ ಪೈಪುಗಳಲ್ಲಿ ಸಾಗುವ ನೀರು ಆಹಾರ
ಕೋಮ ಎಂದರೆ ಹೀಗೆ ಅಂತೆ
ನಾಳೆ ಬೆಳಗ್ಗೆಯಷ್ಟು ಹೊತ್ತಿಗೆ
ಸ್ವತಃ ಉಸಿರಾಟದ ಯಂತ್ರಗಳನ್ನು ನಿಲ್ಲಿಸಿದರೆ ಸಾಕಂತೆ
ಹೊರಗೆ ವಿಷ್ಣುಸಹಸ್ರನಾಮದ ಜಪ

ಎಳೆ ಎಳೆಯಾಗಿ ಸುತ್ತಿಕೊಂಡಿದ್ದ ಬಳ್ಳಿಗಳನ್ನೆಲ್ಲಾ ತೆಗೆದಾಗ
ಟಿಕೆಟ್ ಕೌಂಟರಿನಲ್ಲಿ ಟಿಕೆಟ್ ಕೊಡುವವ
ಮನೆಗೆ ವಾಪಸಾಗುವಾಗ ಎಡವಿ ಬಿದ್ದು
ಗಾಯವಾಗಿ ಹುಣ್ಣಾಗಿ ಹರಡಿ
ಎರಡೂ ಕಾಲು ತೆಗೆದರಂತೆ
ಒಳಗೆ ಕಡಲೆಕಾಯಿ ಮಾರುತ್ತಿದ್ದವ ಹೇಳಿದ್ದು
(ಅವನೇ ಟಿಕೆಟ್ ಹರಿಯುತ್ತಿದ್ದವನೂ ಹೌದು)

ಯಾವುದೋ ವಿವಾದದಲ್ಲಿರುವ ಕಾರಣ
ಭೂತಗಳೋ ಪ್ರೇತಗಳೋ ವಾಸವಾಗಿರಬೇಕು
ಕುಳಿತು ಎಲ್ಲವೂ ಸಿನಿಮಾ ವೀಕ್ಷಿಸುತ್ತಿರಬಹುದು
("ಭೂತಗಳ ಸಿನಿಮಾ ಮಂದಿರ" ಒಳ್ಳೆಯ ಹೆಸರಿಡಬಹುದು)
ಕೊಳೆತು ನಾರುವ ವಾಸನೆ
ಕುಳಿತು ನೋಡುತ್ತಿದ್ದ ಚೇರುಗಳು ತುಕ್ಕು ಹಿಡಿದಿವೆ
ಗಾಂಧೀಕ್ಲಾಸಲ್ಲಿ ಬೆಳೆದ ಹುಲ್ಲಲ್ಲಿ
ಹಾಯಾಗಿ ಮಲಗಿರುವ ಹಾವು ಛೇಳು ಇತರೆ
ರಸ್ತೆಗೆ ಈ ಸಿನಿಮಾ ಮಂದಿರದ್ದೆ ಹೆಸರು
ಮೊನ್ನೆ ಬಿಡುಗಡೆಗೊಂಡ ಪುಸ್ತಕದಲ್ಲಿ
ಸ್ಥಳ ಪುರಾಣದ ಕಾರಣ ಉಲ್ಲೇಖಿಸಿದ್ದಾರೆ.

ಸಿನಿಮಾ ಪರದೆ ಇದ್ದ ಜಾಗದಲ್ಲೀಗ ಖಾಲಿ ಗೋಡೆ
ಪ್ರೊಜೆಕ್ಟರ್ ರೂಮಿನ ತುಂಬ ಹರಿದ ರೀಲುಗಳು
ಅದೆಷ್ಟು ನಾಯಕರೊ, ನಾಯಕಿಯರೊ, ಖಳನಾಯಕರೊ
ಲೆಕ್ಕಕ್ಕೆ ಸಿಗದ ಅಗಾಧ ಪಾತ್ರಗಳ
ಕರಿ ರೀಲುಗಳು ಚದುರಿ ಮಳೆ ನೀರಿಗೆ ತೊಯ್ದು
ಕೊಳೆಯಲಾರದೆ ಬಿದ್ದಿದ್ದವು

ಅವ ಮಲಗಿದ್ದ ಹಾಸಿಗೆ ದಿಂಬು ಎಲ್ಲವನ್ನೂ ಸುಡಬೇಕು
ಅಥವಾ ಯಾರಿಗಾದರೂ ಕೊಡಬೇಕು
ಮನೆ ಆರು ತಿಂಗಳಾದರೂ ಮುಚ್ಚಬೇಕು - ಸಾವು ದೋಷವಂತೆ
ಆಸ್ಪತ್ರೆಯಲ್ಲಿ ಪ್ರತಿ ರೋಗಿ ಬದಲಾದಂತೆ
ಹೊದಿಕೆ ಬಟ್ಟೆ ಎಲ್ಲವನ್ನೂ ತೊಳೆದು ಬದಲಿಸುತ್ತಾರೆ
ಸ್ವಲ್ಪ ಮಾಸಿದ ಬಟ್ಟೆಗಳನ್ನು ಅನಾಥಾಶ್ರಮಗಳು, ವೃದ್ಧಾಶ್ರಮಗಳಿಗೆ
ದಾನ ಮಾಡಲು ಸಂಘ ಸಂಸ್ಥೆಗಳು
ಸಾಲಾಗಿ ಬಂದು ಸ್ವೀಕರಿಸುತ್ತವೆ.

ಪ್ರತಿ ಶುಕ್ರವಾರವೂ ಹೊಸ ಸಿನಿಮಾಗಳು ಬಿಡುಗಡೆಯಾಗುತ್ತಿರುತ್ತವೆ
ಗುರುತಿರದ ಶವಗಳನ್ನು ಒಟ್ಟಿಗೆ ಆಸ್ಪತ್ರೆಯಿಂದ ಹೊರ ಹಾಕುತ್ತಾರೆ
ಸರ್ಕಾರಿ ಕಛೇರಿಗಳಲ್ಲಿ ಹಲವು ವರ್ಷಗಳಿಗೊಮ್ಮೆ ಕಡತ ಯಙ್ಞವನ್ನು ನೆರವೇರಿಸುತ್ತಿರುತ್ತಾರೆ

ಹಳೆಯ ಸಿನಿಮಾಗಳ ಸರ್ಕಾರಿ ದಾಖಲೆಯೊಂದು ಬರೆಯಲ್ಪಟ್ಟು
ರಸ್ತೆಗೆ ಯಾವುದೋ ಸತ್ತ ದೊಡ್ಡ ಮನುಷ್ಯನ ಹೆಸರಿನ ನಾಮಕರಣವಾಗಿ
ಸಿನಿಮಾ ಮಂದಿರದ ಕಟ್ಟಡ ವಿಚಾರದ ವಿವಾದ ಬಗೆಹರಿದು
ಬಹುಮಹಡಿ ಕಟ್ಟಡದ ವಾಸ್ತು ವಿನ್ಯಾಸ ಸಿದ್ಧಗೊಳ್ಳುತ್ತಿರುವಾಗ
ಸಾಕ್ಷ್ಯಚಿತ್ರ ತಯಾರಿಸಲು ಬಂದವ
ಚಿತ್ರೀಕರಿಸುತ್ತಿರುತ್ತಾನೆ.

ಲಹರಿ - ೧


ಅಗಾಧ ವಿಸ್ತಾರದ ಮೈ ಮುಟ್ಟಿದ್ದಷ್ಟೆ
ಮುದುಡಿ ಎದ್ದು ಮತ್ತೆ
ಅದೇಗೆ ತಿಳಿಯೋದು ಹೇಳು
ನಡಿಗೆಯ ಪರಿಪಕ್ವತೆಯ ಪೂರ್ಣತೆಗೆ
ಹಿಂದೆ ಹಿಂಬಾಲಿಸಿದ್ದು ಇಲ್ಲಿಯವರೆಗೆ
ಛಾಯಾಗ್ರಹಣಕ್ಕೆ ಸಿಕ್ಕ ನೋಟ
ಕಣ್ಣಿಗೆ ಕಂಡಂತಲ್ಲ
ಕಾಣೆಯಾದ ಛಾಯಾಗ್ರಾಹಕನ ಚಹರೆಯ ಗುರುತು
ಅವನೇ ತೆಗೆದ ಅವನ ಚಿತ್ರ.

ತೂಗು ಮಂಚದ ಬಗಲಲ್ಲಿ ದೇವ ಕನ್ಯೆ
ಮಡಿಲಲ್ಲ ಹೊತ್ತ ಪುಟ್ಟ ಮಗು
ಜೊತೆಗಾಡುವ ಮಣ್ಣ ಆಟಿಕೆಗಳು
ಬಿಟ್ಟು ಬಂದಾಕೆ ಮಂಚದ ಮೇಲೆ ಕೂತಿರುವಾಗ
ಮಡಿಲಲ್ಲಿ ಮಗು - ನನ್ನನ್ನೇ ನೋಡಿದಂತಿತ್ತು

ಆ ನಡೆಯಲ್ಲಿ ಸೋತು ಹಿಂತಿರುಗುವಾಗ
ಆಹ್ವಾನದ ಬಗೆಯಲ್ಲಿ ಅರಳಿ ಮಾತಾಗಿ
ಮಂತ್ರಕ್ಕೆ ಸ್ವಾಗತವನಿತ್ತ ತಂತ್ರವು
ಅವತಾರಗೊಂಡು ಆವರಿಸಿ
ದಿಕ್ಕು ಚಲನೆಗಳು ತಪ್ಪಿದ ಮಾರ್ಗಕ್ಕೆ
ಹಪಾಹಪಿಸಿದರೂನೂ
ಬಣ್ಣ ತುಂಬಿದ ಚಿತ್ರವು ವೇದಿಕೆಯಾಗಿ
ನೃತ್ಯ ಆಯಾಮ ವಿಸ್ತಾರಗೊಂಡು ಚಲ್ಲಿದವು
ಹಬ್ಬ ಸಂಭ್ರಮವಾಗಿತ್ತು
ಹಿಂತಿರುಗಿ ನೋಡಿದೆ, ಏನಿತ್ತು?

ಸಂಕೀರ್ಣ ನಡೆಯ ಲೆಕ್ಕಾಚಾರ
ಪರಿಧಿಯ ಎಲ್ಲೆಗಳ ಸಂಘರ್ಷಣೆಯ
ಅಂತಿಮ ಯಾತ್ರೆಯ ಮುನ್ನುಡಿ
ನಿಸಿಧಿಯ ಕಲೆಗಾರ ಬಡವ
ಕೆತ್ತಿದ ಶಿಲ್ಪಿಯ ಉಳಿ ಮುರಿದು
ಕೆತ್ತಿದ್ದು ಉಳಿದ ಹೆಸರು
ಕತೆ ಮರೆತು ಚರಿತ್ರೆಯಾಗಿ ಹರಿದು  
ಮನೆಯ ಬಾಗಿಲಿಗೆ ತೋರಣವಾಗಿ
ಒಡೆದ ಕಲ್ಲು ತಳದಲ್ಲಿ ಹನಿಯಾಗಿತ್ತು.

ಹಿಂತಿರುಗುವಾಗ ಮರದ ತುಂಬ ಹೂ
ಹಾಸಿ ಸಿಂಗರಿಸಿಕೊಂಡ ಬಯಲಿಗೆ ನಾಚಿಕೆ
ಕಂಪಿಸಿದ್ದು ಕೇಣಿಸಿದ್ದಿದೆ ಕುಣಿತಕ್ಕೆ
ಮೈ ಹಿಗ್ಗಿ ಹತ್ತಿ ತುದಿ
ಕಲ್ಲು ಮಂಟಪದ ಒಳಗಿನ ಗುಡ್ಡದ ದೇವರ
ಹಿರಿಮೆಗೆ ಜೋಗಿ ಜಂಗಮನ ಜೋಳಿಗೆ
ಕಾಣೆಯಾಗಿತ್ತು
ಬಯಸಿತ್ತು ಹಿಡಿದ ಕೈಯ ಕಂಪನವು
ಇಳಿವ ಜಾಡ ಹರಸಿ ಮಾಯವಾದ ರೂಪಕ್ಕೆ
ಪ್ರತಿರೂಪವಾದ ನೆನಪಲ್ಲಿ ಜೀವ ಮಾಗಿತ್ತು.