ಹಾಗಾಗಿ ….



ಏನು ನೆನಪಿರಬಹುದೆಂದೆ?
ಬಿದ್ದ ಮಳೆಗೆ ತೊಯ್ದ ದೇಹ
ಅದರುತ್ತಿದ್ದ ತುಟಿಗಳು
ಕತ್ತಲಾಗಿತ್ತಲ್ಲವ ಅಂದು
ಒಂಟಿ ಭಯವಾಗುತ್ತೆ, ರಸ್ತೆ ಕೊನೆ
ಯಾರೂ ಇರುವುದಿಲ್ಲ
ಅಪ್ಪಿ ತುಟಿಗೆ ತುಟಿ ತಾಕಿಸಬೇಕೆಂದೆನಿಸಿತ್ತಲ್ಲವ
ಹೋ ನೆನಪಾಯಿತೆಂದೆಯ
ಸಿನಿಮಾದ ಪ್ರಣಯ ಸನ್ನಿವೇಶದಂತೆ

ಹೇಗೆ ಮಲಗಿದ್ದೆ ಗೊತ್ತ ?
ಡುಮ್ಮಿ ಎಂದು ರೇಗಿಸುತ್ತಿದ್ದೆಯಲ್ಲ
ಬರೀ ಮೂಳೆ ಚರ್ಮದೊಂದಿಗೆ
ಶರೀರ ಅಷ್ಟು ದಪ್ಪ
ತಿಂಗಳುಗಳು ಹಿಡಿದಿತ್ತು
ಅಷ್ಟೂ ರಕ್ತ ಹೊರ ಹರಿಯಲಿಕ್ಕೆ
ಕೊಳ್ಳಿ ಹಿಡಿಯುವವರ್ಯಾರೆಂಬುದು ಧರ್ಮಸಂಕಟ
ಅಪ್ಪನ ? ಗಂಡನ ? ಮೂರು ತಿಂಗಳ ಹಸಿ ಕೂಸ?
ಬಿಡು, ನೀನು ಅಲ್ಲಿರಲಿಲ್ಲವಲ್ಲ

ಹಾಂ ಈಗ ಹೇಳು
ನನ್ನ ಮುಖ ಹೇಗಿತ್ತು
ಕಣ್ಣುಗಳು? ಸ್ವಲ್ಪ ನೆನಪಿಸಿಕೊ
ಪ್ರೇತಾತ್ಮಕ್ಕೆ ಬಿಂಬ ಮೂಡುವುದಿಲ್ಲವಂತೆ
ನೀನಾದರೂ ಹೇಳಬಹುದೇನೋ ಎಂದು

1 ಕಾಮೆಂಟ್‌: