ವಿಷಯಕ್ಕೆ ಹೋಗಿ

ಒಂದು ಸಿನಿಮಾ ಕತೆ

                                               

ಎಲ್ಲವೂ ಸರಳೀಕರಣಗೊಂಡ
ವೇಷದಲ್ಲಿ ನಿಂತಿದ್ದ ಫಕೀರ
ಹಸಿರು ಬಳ್ಳಿಗಳು ಧಾರಾಳವಾಗಿ ಬೆಳೆದಿದ್ದ ಟಿಕೆಟ್ ಕೌಂಟರ್
ಪ್ರದರ್ಶನ ಸಮಯ ಮಾಸಿದ ಬಣ್ಣದಲ್ಲಿ
ಅಸ್ಪಷ್ಟವಾಗಿದ್ದ ಆ ಸಿನಿಮಾ ಮಂದಿರ
ಸುತ್ತ  ವತ್ತುವರಿಗೊಂಡಿದ್ದ ಕಾರು ಸ್ಕೂಟರ್
ಮೆಕ್ಯಾನಿಕ್ ಗ್ಯಾರೇಜ್ ಶೆಡ್ಡು

ಆಸ್ಪತ್ರೆಯಲ್ಲಿ ಮೂಗಿನಾಳದಲ್ಲಿ ಇಳಿದಿದ್ದ
ಸಣ್ಣ ಪೈಪುಗಳಲ್ಲಿ ಸಾಗುವ ನೀರು ಆಹಾರ
ಕೋಮ ಎಂದರೆ ಹೀಗೆ ಅಂತೆ
ನಾಳೆ ಬೆಳಗ್ಗೆಯಷ್ಟು ಹೊತ್ತಿಗೆ
ಸ್ವತಃ ಉಸಿರಾಟದ ಯಂತ್ರಗಳನ್ನು ನಿಲ್ಲಿಸಿದರೆ ಸಾಕಂತೆ
ಹೊರಗೆ ವಿಷ್ಣುಸಹಸ್ರನಾಮದ ಜಪ

ಎಳೆ ಎಳೆಯಾಗಿ ಸುತ್ತಿಕೊಂಡಿದ್ದ ಬಳ್ಳಿಗಳನ್ನೆಲ್ಲಾ ತೆಗೆದಾಗ
ಟಿಕೆಟ್ ಕೌಂಟರಿನಲ್ಲಿ ಟಿಕೆಟ್ ಕೊಡುವವ
ಮನೆಗೆ ವಾಪಸಾಗುವಾಗ ಎಡವಿ ಬಿದ್ದು
ಗಾಯವಾಗಿ ಹುಣ್ಣಾಗಿ ಹರಡಿ
ಎರಡೂ ಕಾಲು ತೆಗೆದರಂತೆ
ಒಳಗೆ ಕಡಲೆಕಾಯಿ ಮಾರುತ್ತಿದ್ದವ ಹೇಳಿದ್ದು
(ಅವನೇ ಟಿಕೆಟ್ ಹರಿಯುತ್ತಿದ್ದವನೂ ಹೌದು)

ಯಾವುದೋ ವಿವಾದದಲ್ಲಿರುವ ಕಾರಣ
ಭೂತಗಳೋ ಪ್ರೇತಗಳೋ ವಾಸವಾಗಿರಬೇಕು
ಕುಳಿತು ಎಲ್ಲವೂ ಸಿನಿಮಾ ವೀಕ್ಷಿಸುತ್ತಿರಬಹುದು
("ಭೂತಗಳ ಸಿನಿಮಾ ಮಂದಿರ" ಒಳ್ಳೆಯ ಹೆಸರಿಡಬಹುದು)
ಕೊಳೆತು ನಾರುವ ವಾಸನೆ
ಕುಳಿತು ನೋಡುತ್ತಿದ್ದ ಚೇರುಗಳು ತುಕ್ಕು ಹಿಡಿದಿವೆ
ಗಾಂಧೀಕ್ಲಾಸಲ್ಲಿ ಬೆಳೆದ ಹುಲ್ಲಲ್ಲಿ
ಹಾಯಾಗಿ ಮಲಗಿರುವ ಹಾವು ಛೇಳು ಇತರೆ
ರಸ್ತೆಗೆ ಈ ಸಿನಿಮಾ ಮಂದಿರದ್ದೆ ಹೆಸರು
ಮೊನ್ನೆ ಬಿಡುಗಡೆಗೊಂಡ ಪುಸ್ತಕದಲ್ಲಿ
ಸ್ಥಳ ಪುರಾಣದ ಕಾರಣ ಉಲ್ಲೇಖಿಸಿದ್ದಾರೆ.

ಸಿನಿಮಾ ಪರದೆ ಇದ್ದ ಜಾಗದಲ್ಲೀಗ ಖಾಲಿ ಗೋಡೆ
ಪ್ರೊಜೆಕ್ಟರ್ ರೂಮಿನ ತುಂಬ ಹರಿದ ರೀಲುಗಳು
ಅದೆಷ್ಟು ನಾಯಕರೊ, ನಾಯಕಿಯರೊ, ಖಳನಾಯಕರೊ
ಲೆಕ್ಕಕ್ಕೆ ಸಿಗದ ಅಗಾಧ ಪಾತ್ರಗಳ
ಕರಿ ರೀಲುಗಳು ಚದುರಿ ಮಳೆ ನೀರಿಗೆ ತೊಯ್ದು
ಕೊಳೆಯಲಾರದೆ ಬಿದ್ದಿದ್ದವು

ಅವ ಮಲಗಿದ್ದ ಹಾಸಿಗೆ ದಿಂಬು ಎಲ್ಲವನ್ನೂ ಸುಡಬೇಕು
ಅಥವಾ ಯಾರಿಗಾದರೂ ಕೊಡಬೇಕು
ಮನೆ ಆರು ತಿಂಗಳಾದರೂ ಮುಚ್ಚಬೇಕು - ಸಾವು ದೋಷವಂತೆ
ಆಸ್ಪತ್ರೆಯಲ್ಲಿ ಪ್ರತಿ ರೋಗಿ ಬದಲಾದಂತೆ
ಹೊದಿಕೆ ಬಟ್ಟೆ ಎಲ್ಲವನ್ನೂ ತೊಳೆದು ಬದಲಿಸುತ್ತಾರೆ
ಸ್ವಲ್ಪ ಮಾಸಿದ ಬಟ್ಟೆಗಳನ್ನು ಅನಾಥಾಶ್ರಮಗಳು, ವೃದ್ಧಾಶ್ರಮಗಳಿಗೆ
ದಾನ ಮಾಡಲು ಸಂಘ ಸಂಸ್ಥೆಗಳು
ಸಾಲಾಗಿ ಬಂದು ಸ್ವೀಕರಿಸುತ್ತವೆ.

ಪ್ರತಿ ಶುಕ್ರವಾರವೂ ಹೊಸ ಸಿನಿಮಾಗಳು ಬಿಡುಗಡೆಯಾಗುತ್ತಿರುತ್ತವೆ
ಗುರುತಿರದ ಶವಗಳನ್ನು ಒಟ್ಟಿಗೆ ಆಸ್ಪತ್ರೆಯಿಂದ ಹೊರ ಹಾಕುತ್ತಾರೆ
ಸರ್ಕಾರಿ ಕಛೇರಿಗಳಲ್ಲಿ ಹಲವು ವರ್ಷಗಳಿಗೊಮ್ಮೆ ಕಡತ ಯಙ್ಞವನ್ನು ನೆರವೇರಿಸುತ್ತಿರುತ್ತಾರೆ

ಹಳೆಯ ಸಿನಿಮಾಗಳ ಸರ್ಕಾರಿ ದಾಖಲೆಯೊಂದು ಬರೆಯಲ್ಪಟ್ಟು
ರಸ್ತೆಗೆ ಯಾವುದೋ ಸತ್ತ ದೊಡ್ಡ ಮನುಷ್ಯನ ಹೆಸರಿನ ನಾಮಕರಣವಾಗಿ
ಸಿನಿಮಾ ಮಂದಿರದ ಕಟ್ಟಡ ವಿಚಾರದ ವಿವಾದ ಬಗೆಹರಿದು
ಬಹುಮಹಡಿ ಕಟ್ಟಡದ ವಾಸ್ತು ವಿನ್ಯಾಸ ಸಿದ್ಧಗೊಳ್ಳುತ್ತಿರುವಾಗ
ಸಾಕ್ಷ್ಯಚಿತ್ರ ತಯಾರಿಸಲು ಬಂದವ
ಚಿತ್ರೀಕರಿಸುತ್ತಿರುತ್ತಾನೆ.

ಕಾಮೆಂಟ್‌ಗಳು

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಹಳೆಯ ಮೊಳೆ ಹಾಗೂ ಹೊಸ ಮದುವೆ : ಒಂದು ಉಪಮೆ

ಹಾಗಾಗಿ ಮೊಳೆಯೇ
ಇದು ನಿನ್ನದೇ ತಪ್ಪೆಂದು ತೀರ್ಪನ್ನಿರಿಸಿದ್ದಾರೆ

ಆಗಿದ್ದಿಷ್ಟು

ಹೆಣ್ಣನ್ನು ಮನೆ ತುಂಬಿಸಿಕೊಳ್ಳುವಾಗ
ಹೊಸಲ ಮೇಲೆ ಕಾಸನ್ನಿಟ್ಟು ಮೊಳೆ ಹೊಡಿಸುವುದು
ಸಂಪ್ರದಾಯ

ಹೆಣ್ಣು ಗಂಡು ಅದೆಷ್ಟೇ ಪ್ರಯತ್ನಿಸಿದರೂ
ಅಂದು ಮೊಳೆ ಹೊಡೆಯುವುದು ಕಷ್ಟವಿತ್ತು
ಸುತ್ತಿಗೆ ಸರಿಯಿರಲಿಲ್ಲ ಮೊಳೆ ಚೂಪಿರಲಿಲ್ಲ ಕಾಸು ಗಟ್ಟಿಯಿತ್ತು
ಹುಡುಗ ಹುಡುಗಿ ದಣಿದಿದ್ದರು
ಇತ್ಯಾದಿ ಇತ್ಯಾದಿ

ಬಲ ಬಿಟ್ಟು ಹೊಡೆದಾಗ
ಮೊಳೆ ಹೊಸಲಿಗೆ ತಾಗುತ್ತಲೆ
ಗಂಡಿನ ಬೆರಳಿಗೂ - ಹೆಣ್ಣಿನ ಬೆರಳಿಗೂ ತಾಗಿ
ಇಬ್ಬರ ರಕ್ತವನ್ನೂ ಬೆರೆಸಿ
ಹೊಸಲಿಗಿಳಿದಿತ್ತು

ಮಾರನೇ ದಿನದಿಂದ
ಹುಡುಗ  ಹುಡುಗಿ
ಎಲ್ಲರೂ
ರಕ್ತ ಬಳಿದ ಹೊಸಲನ್ನು ದಾಟುತ್ತಲೇ ಸಂ
ಸಾರ ಸಾಗಿಸುತ್ತಿದ್ದರು

ಮೊದಲಿಗೆ ಬೆರಳಿಗೆ ಗಾಯವಾದದ್ದು
ಹುಣ್ಣಾಗಿ
ಮೊದಲು ಬೆರಳು, ಆಮೇಲೆ ಕೈ, ನಂತರ ದೇಹ
ಹೀಗೆ ಪೂರ ಆವರಿಸಿ ಮುಗಿಸುವ ಹೊತ್ತಿಗೆ
ಇಬ್ಬರ ಆಯಸ್ಸೂ

ಈಗ ಹೇಳಿ
ಇದು ಮೊಳೆಯದೇ ತಪ್ಪಲ್ಲವೆ
ಹಾಗಾಗಿ
ಹೊಸಲನ್ನು ಬಿಟ್ಟು ನಾಣ್ಯವನ್ನು ಬಿಟ್ಟು
ಹೊಡೆದ ಸುತ್ತಿಗೆಯನ್ನೂ ಕೈಯನ್ನೂ ಬಿಟ್ಟು
ಮೊಳೆಯನ್ನೇ ಶಿಕ್ಷಿಸಬೇಕಾಗಿ ತೀರ್ಪಾಗಿದೆ.

ನಮ್ಮ ಜ್ಯೋತಿ ಮೇಡಂ

ನನ್ನ ಬದುಕು ನನ್ನದು ಮಾತ್ರವೆಂದು ಎಂದೂ ನನಗನ್ನಿಸಿಲ್ಲ. ಈ ಬದುಕಿಗೆ ಅದೆಷ್ಟೋ ಜನರ ಪಾಲಿದೆ. ತಂದೆ ತಾಯಿಯ ನಂತರ ನನ್ನ ಬದುಕನ್ನು ರೂಪಿಸಿದ ಬಹು ದೊಡ್ಡ ಪಾಲು ನನ್ನ ಗಣಿತ ಶಿಕ್ಷಕಿ ನಾಗಜ್ಯೋತಿ ಮೇಡಂಗೆ ಸಲ್ಲುತ್ತದೆ. ಅವರು ತೀರಿಹೋಗಿದ್ದಾರೆ ಎಂಬುದು ಎಂದಿಗೂ ನಂಬಲಾರದ ಸಂಗತಿ. ಎಂದಿಗೂ ಮರೆಯಲಾರದ, ಬದುಕಿನ ಪ್ರತೀ ಹಂತವನ್ನೂ ಪ್ರಭಾವಿಸಿದ ವ್ಯಕ್ತಿ ನಮ್ಮ ಬದುಕಿಂದ ದೂರವಾಗಲು ಸಾದ್ಯವಿಲ್ಲ. ನಮ್ಮದೇ ಬದುಕಿನಲ್ಲಿ ಅವರ ಜೀವಂತಿಕೆ ಕಾಣಲು ಸಾದ್ಯ. ನನ್ನ ಬದುಕಿನಲ್ಲಂತೂ ಬದುಕಿನ ಪ್ರತೀ ಹಂತದಲ್ಲೂ ಅವರು ಕಟ್ಟಿಕೊಟ್ಟ ಮೌಲ್ಯಗಳು ಜೀವಂತವಾಗಿರುವವರೆಗೂ ಅವರೂ ನನ್ನ ಮಟ್ಟಿಗೆ ಜೀವಂತ. 
ಇವತ್ತಿಗೂ ಕಣ್ಣಮುಂದೆ ಕಟ್ಟಿದಂತಿದೆ ಆ ದೃಷ್ಯ. ಕನ್ನಡ ಮಾಧ್ಯಮವನ್ನು ಏಳನೇ ತರಗತಿಯವರೆಗೂ ಓದಿದ್ದು, ಎಂಟನೇ ತರಗತಿಗೆ ಆಂಗ್ಲ ಮಾಧ್ಯಮ. ಏನಾಗುತ್ತೋ ಏನೋ ಎಂಬ ವಿಪರೀತ ಭಯ. ಆಗಲೇ ನನ್ನ ಅಕ್ಕ, ಹಳೇ ಟೀವಿಎಸ್ ಸ್ಕೂಟರ್ ಅಲ್ಲಿ ಕರೆದುಕೊಂಡು ಬಂದು, ಇವರ ಹಳೇ ಮನೆಯ ಮುಂದೆ ನಿಲ್ಲಿಸಿ ಕರೆದುಕೊಂಡು ಹೋಗಿ ಮೇಡಂಗೆ ಪರಿಚಯಿಸಿ  ಮನೆ ಪಾಠಕ್ಕೆ ಕಳುಹಿಸಿದ್ದು. ಎಂಟನೇ ತರಗತಿಯಿಂದಲೇ ಮನೆಪಾಠಕ್ಕೆ ಸೇರಿದ್ದು. ಆಗ ಹಳೆಯ ಮನೆಯಲ್ಲಿದ್ದರು. ನಾನು ಆ ಹಳೆಯ ಮನೆಗೆ ಪಾಠಕ್ಕೆ ಹೋಗುತ್ತಿದ್ದ ಹಳೆಯ ವಿಧ್ಯಾರ್ಥಿ. ಮೇಡಂ ಗಣಿತ, ವಿಜ್ಞಾನ, ಪಾಠ ಮಾಡುತ್ತಿದ್ದರು, ನಾಗೇಂದ್ರ ಸಾರ್ ಸಮಾಜ ವಿಜ್ಞಾನ ಇಂಗ್ಲೀಷ್ ಪಾಠ ಮಾಡುತ್ತಿದ್ದರು. ನಾನು ಹಳ್ಳಿಯಿಂದ ಸುಮಾರು ಆರು ಕಿ…

ಭೌತಶಾಸ್ತ್ರದ ಪ್ರೀತಿಗಾಗಿ

ಇನ್ನೇನು ಆಗಲೇ ಕಾಲೇಜು, ಮುಖ್ಯವಾಗಿ ಪದವಿ ತರಗತಿಗಳು ಆರಂಭವಾಗಿರಬೇಕು ಅಥವಾ ಇಷ್ಟರಲ್ಲೇ ಆರಂಭವಾಗಬಹುದು. PUC ಎಂಬ ತ್ರಾಸಮಯ ಘಟ್ಟ ಮುಗಿಸಿ ಈಗ ಹೊಸದೊಂದು ಯಾನವನ್ನ ಆರಂಭಿಸಲು ಹೊರಡುವ ಸಮಯ. ಹಲವರು ಇಂಜಿನಿಯರಿಂಗ್ ಎಂದೋ ಮೆಡಿಕಲ್ ಎಂದೋ ಹೋಗಿರುತ್ತಾರೆ. ಕೆಲವರು ಮೂಲತಃ ಮೂಲ ವಿಜ್ಞಾನದಲ್ಲಿ ಆಸಕ್ತಿಯಿರುವವರು ಪದವಿಗೆ ಸೇರಿರುತ್ತಾರೆ. ಮತ್ತೆ ಕೆಲವರಿಗೆ ಮೂಲ ವಿಜ್ಞಾನದಲ್ಲಿ ಆಸಕ್ತಿಯಿದ್ದರೂ ಇಂಜಿನಿಯರಿಂಗ್ ಸೇರಿರುತ್ತಾರೆ. ಮೂಲ ವಿಜ್ಞಾನದಲ್ಲಿ ಆಸಕ್ತರಾಗಿ ಮುಂದೆ ಸಂಶೋಧಕರಾಗಬೇಕೆಂದು ಬಯಸುವವರಿಗೆ ನನ್ನ ಅನುಭವದಲ್ಲಿ ದಕ್ಕಿದ ಒಂದಿಷ್ಟು ಮಾಹಿತಿಗಳನ್ನ ಕೊಡಬೇಕೆಂದೆನಿಸಿ ಈ ಲೇಖನ ಬರೆಯುತ್ತಿದ್ದೀನಿ. ನನ್ನ ಕ್ಷೇತ್ರ ಸೈದ್ಧಾಂತಿಕ ಬೌತಶಾಸ್ತ್ರ., ಹಾಗಾಗಿ ಆ ಕ್ಷೇತ್ರದ ಬಗೆಗೆ ಮಾತ್ರ ದೀರ್ಘವಾಗಿ ಬರೆಯುತ್ತೀದ್ದೀನಿ. ನನ್ನ ಸ್ನೇಹಿತರ್ಯಾರಾದರೂ ಒಪ್ಪಿದರೆ ಉಳಿದ ಕ್ಷೇತ್ರಗಳ ಬಗೆಗೆ ಬರೆಸಲು ಪ್ರಯತ್ನಿಸುತ್ತೇನೆ.. ಅಷ್ಟೇ ಅಲ್ಲ ಮಾನವೀಯ ವಿಷಯಗಳ ಬಗೆಗೂ ಬರೆಸಬೇಕೆಂದಿದ್ದೇನೆ ಮುಂದಿನ ದಿನಗಳಲ್ಲಿ ಪ್ರಯತ್ನಿಸುತ್ತೇನೆ. ವಿಷಯಾಧಾರಿತ ಭಿನ್ನಾಭಿಪ್ರಾಯಗಳನ್ನು ಹೊರತುಪಡಿಸಿ ಉಳಿದ ಹಲವು ವಿಷಯಗಳನ್ನು ಸಮಾನವಾಗಿ ಸ್ವೀಕರಿಸಬಹುದು. ಇಲ್ಲಿನ ವಸ್ತುನಿಷ್ಠ ವಿಷಯಗಳನ್ನು ಹೊರತುಪಡಿಸಿ ಉಳಿದದ್ದು ನನ್ನ ಅನುಭವಕ್ಕೆ ಬಂದವುಗಳು, ಹಲವನ್ನು ನಾವುಗಳು ಅನುಸರಿಸಿದವುಗಳು. ಇವೇ "ಇದ ಮಿತ್ತಂ" ಎಂಬಂತಹ ಶಾಸನಗಳೇನೂ‌ ಅಲ್ಲ. ಎಲ್ಲರಿಗೂ…