ವಿಷಯಕ್ಕೆ ಹೋಗಿ

ಪೋಸ್ಟ್‌ಗಳು

October, 2013 ರಿಂದ ಪೋಸ್ಟ್‌ಗಳನ್ನು ತೋರಿಸುತ್ತಿದೆ

ಗರುಡಗಂಬದ ಕತೆಗಳು

ನನ್ನ ತಾತ ಕಡೇ ದಿನಗಳಲ್ಲಿ ಬಾಳ ಹಲುಬುತ್ತಿದ್ದ
ಗರುಡಗಂಬ ಗರ್ಡಗಂಬ ಗರ್ಡಗಂಬ ಅಂತ
ಚಂದಾ ಪಡೀಲಿಕ್ಕೆ ರಸೀದಿಗಳನ್ನೂ ಮುದ್ರಿಸಿದ್ದ
ಅದ್ಯಾಕೋ ಗರುಡಗಂಬಾನ ಪ್ರತಿಷ್ಟಾಪಿಸಲಿಕ್ಕೆ ಆಗಿರಲೇ ಇಲ್ಲ.

ತಾತ ಹೋದ ನಂತರ
ನನ್ನ ಗಣಿತದ ಲೆಕ್ಕಾಚಾರದ ಅಭ್ಯಾಸಕ್ಕೆ
ಈ ರಸೀದಿ ಪುಸ್ತಕಗಳನ್ನುಪಯೋಗಿಸಿದ್ದೆ
ಪ್ರಥಮ ದರ್ಜೆಯಲ್ಲಿ ಪಾಸಾಗಿ
ಸೈದ್ಧಾಂತಿಕ ಭೌತಶಾಸ್ತ್ರಜ್ಞನಾದೆ

ನನ್ನ ತಾತ ಕಟ್ಟಿದ ಮನೆಯನ್ನ
ನವೀಕರಣಕ್ಕೊಳಪಡಿಸಹೊರಟಾಗ
ನನ್ನ ಹಳೆಯ ಪುಸ್ತಕಗಳ ಜೊತೇಲಿ
ಈ ರಸೀದಿ ಪುಸ್ತಕಗಳೂ ಸಿಕ್ಕವು

ಇತ್ತೀಚೆಗೊಮ್ಮೆ ಆಕಸ್ಮಿಕವಾಗಿ
ಊರ ಹೊಲದಲ್ಲಿ ಗರುಡಗಂಬವೊಂದು ಸಿಕ್ಕಿತು
ದೇವಸ್ಥಾನದ ಮುಂದೆ ತಂದು ಮಲಗಿಸಿದ್ದಾರೆ

ನನ್ನ ಮಗಳು ಈ ರಸೀದಿಗಳಿಂದ ಕಾಗದದ ದೋಣಿಯನ್ನು ಮಾಡಿ
ಮಳೆ ನೀರಲ್ಲಿ ಹರಿಬಿಟ್ಟಿದ್ದಳು
ಆ ಕಾಗದದ ದೋಣಿಗಳೆಲ್ಲಾ ಬಂದು ಗರುಡಗಂಬಕ್ಕೆ ಸಿಕ್ಕಿ ಹಾಕಿಕೊಂಡಿತ್ತು
ನಾನು ಮಾತ್ರ
ಒಂದೊಂದೇ ದೋಣಿಗಳು ಬಂದು ಅಲ್ಲಿ ಸಿಕ್ಕಿ ಹಾಕಿಕೊಳ್ಳುವುದನ್ನ
ನೋಡುತ್ತಿದ್ದೆ.